İnzibati işlər: qərarların 33,1 faizi həbs qərarı olub
Birinci instansiya məhkəmələrində ötən il baxılmış inzibat işlərin hesabatı açıqlanıb. Aprelin 27-də Dövlət Statistika Komitəsinin Ədliyyə Nazirliyinə istinadla yaydığı hesabata əsasən, 2016-cı ildə birinci instansiya məhkəmələrində inzibati xətalara dair 37490 işə baxılıb ki, bu da 2015-ci ilin göstəricisindən 13,6 faiz azdır.
Məhkəmə işlərinin 55,6 faizi idarəçilik qaydaları, 10,7 faizi ictimai qayda, ictimai təhlükəsizlik və ictimai mənəviyyat, 10 faizi yol hərəkəti qaydaları, 7,8 faizi sağlamlıq, 2,1 faizi gömrük qaydaları, 1,2 faizi iqtisadi fəaliyyət qaydaları, 0,9 faizi ticarət qaydaları, 0,7 faizi mülkiyyət əleyhinə olan, 1 faizi narkotik vasitələrin və psixotrop maddələrin qanunsuz dövriyyəsi ilə əlaqədar, 10 faizi digər inzibati xətalarla bağlı olub.
Novator.az bildirir ki, hesabata görə, 2016-cı ildə baxılmış işlərin 65,7 faizi üzrə inzibati məsuliyyət tədbiri tətbiq edilib, 21,6 faizinin icraatına xitam verilib.
İnzibati məsuliyyət tədbiri tətbiq edilməsi haqqında qərarlara əsasən 24649 nəfər (2015-ci illə müqayisədə 24,9 faiz az) inzibati məsuliyyətə cəlb edilib və onların 35,1 faizinə inzibati cərimə, 33,1 faizinə inzibati həbs, 24,2 faizinə fiziki şəxsə verilmiş xüsusi hüququn məhdudlaşdırılması, 3,3 faizinə xəbərdarlıq, 1,2 faizinə ictimai işlər, 3,1 faizinə isə digər tənbeh növləri tətbiq edilib.
