İnternet prosesi mayın 1-nə qaldı
Səbail Rayon Məhkəməsində Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Mərkəzinin bəzi saytlara girişin bloklanması iddiası ilə aprelin 27-də təyin olunmuş proses təxirə salınıb. Novator.az-ın məlumatına görə, hakim Nurəddin Bağırovun sədrlik etdiyi prosesdə iddiaçının nümayəndəsinin etibarnaməsinin olmadığı bilinib. Bu səbəbdən iclas mayın 1-i saat 15-ə keçirilib.
Elektron Təhlükəsizlik Mərkəzi Azadliq.org-a (“Azadlıq” radiosunun saytı), Azadliq.info-ya (“Azadlıq” qəzetinin saytı), Azerbaycansaati.com-a (“Turan TV”nin saytı), Meydan.tv-yə (“Meydan TV” internet televiziyasının saytı) girişə, eyni zamanda “Azərbaycan saatı” televiziya proqramının yayımına məhdudiyyət qoyulmasını istəyir.
Məhkəməyə martın 30-da müraciət olunub.
Azadliq.org-un məlumatına görə, 27 aprel iclasında bilinib ki, bloklanması tələb olunan saytların rəhbərlərinə bu haqda əvvəlcədən heç bir bilgi verilməyib. Hakim məhkəməyə ərizənin surətini Azadliq.org-un vəkili Adil İsmayılova, Azadliq.info-nun nümayəndəsi Səməd Rəhimliyə və Meydan.tv-nin vəkili Elçin Sadıqova təqdim edib.
Ərizəyə qoşmalarda Baş Prokurorluğun Nəqliyyat, Rabitə və Yüksək Texnologiyalar Nazirliyinə müraciəti və nazirliyin qərarı yer alır. Prokurorluq nazirliyə müraciətində saytlarla bağlı tədbir görülməsini istəyib. Müraciətə həmin saytlarda yayımlanan yazılar da əlavə olunub. Bundan sonra Nəqliyyat, Rabitə və Yüksək Texnologiyalar Nazirliyi saytların bloklanması haqda qərar qəbul edib. Bunun məhkəmə yolu ilə rəsmiləşməsi Elektron Təhlükəsizlik Mərkəzinə həvalə olunub. Mərkəzin rəhbəri Faiq Fərmanov məhkəməyə müraciət edib.
Martın 17-də “İnformasiya, informasiyalaşdırma və informasiyanın mühafizəsi haqqında” qanuna dəyişikliklər təsdiqlənib. Yeniliyə görə, internet informasiya ehtiyatının və onun domen adının sahibi həmin informasiya ehtiyatında yayılması qadağan edilən informasiyanın yerləşdirilməsinə yol verməməlidir. Belə hal olduqda Nəqliyyat, Rabitə və Yüksək Texnologiyalar Nazirliyi internet informasiya ehtiyatına müraciətin məhdudlaşdırılması üçün məhkəməyə müraciət edir.
