Fransada yeni seçki sorğuları
Fransanın İFOP və “Fiducial” şirkətləri prezident seçkisinin ikinci turu ilə bağlı yeni sorğunun nəticələrini açıqlayıb. Mayın 7-də keçiriləcək ikinci turda “İrəli” hərəkatının lideri, sabiq iqtisadiyyat naziri Emmanuel Makron və Milli Cəbhənin lideri Marin Le Pen mübarizə aparır. Aprelin 23-də keçirilmiş ilk turda Emmanuel Makronla Marin Le Pen digər 9 namizədi qabaqlayıblar.
Novator.az-ın məlumatına görə, İFOP və “Fiducial” şirkətlərinin 23-26 aprel arasında keçirdikləri sorğuya 1893 seçici qatılıb. Sorğu ikinci turda seçicilərin 72%-nin iştirak edəcəyini göstərir. İlk tura seçicilərin 77,8%-ə yaxını qatılıb.
Namizədlərin şanslarına gəlincə, Emmanuel Makrona 60,5%, Marin Le Penə 39,5% dəstək verir. İlk turda Emmanuel Makron 24,01%, Marin Le Pen 21,3% səs alıb.
“Odoxa” şirkətinin apardığı yeni sorğuda isə Marin Le Penin reytinqinin ötən ayla müqayisədə 4% artdığı bilinib. Hazırda Milli Cəbhənin liderinə vətəndaşların 33%-i müsbət yanaşır. “İrəli” hərəkatının lideri martla müqayisədə 4% geriləyib. “Odoxa”nın aprel sorğusunda Emmanuel Makrona vətəndaşların 41%-nin rəğbət bəslədiyi ortaya çıxıb.
