Alimlər su təmizləyən yeni filtr icad ediblər
“Water Research” jurnalı İsrail alimlərinin növbəti uğuru barədə geniş material dərc edib.
Novator.az xəbər verir ki, nəşrin yazdığına görə, İsrailin kimyaçı mütəxəssisləri membranların köməyilə suyun tərkibindəki virusları məhv edib təmizləyən filtr icad ediblər.
Ben-Qurion Universitetinin əməkdaşı Moşe Herzberq bildirib ki, virusların inkişaf etdiyi çirkli suları təmizləmək məsələsi artıq ictimai təhlükəsizlik işinə çevrilib: “Xırda virusların şəhərlərə yönələn su axınlarında, ötürücü xətlərdə, su ehtiyatı anbarlarında yer almasına etinasız yanaşmaq mümkün deyil. Qurğulara, hətta müasir texnologiyanın köməyilə qorunan su ehtiyatlarına da virus düşür. Bu problem, suyun çirklənməsi tək bizi deyil, bütün dünyanı düşündürən məsələdir. Bu sahədə ABŞ-da da ciddi tədqiqatlar aparılır, tədbirlər görülür, ancaq problemlər hələ qalır. Dünya suları, göllər, içməli su mənbələri virusla doludur”.
Hezberq və ona dəstək verən kimyaçılar komandasının hazırladığı sutəmizləyən qurğu uğurla sınaqdan keçirilib. Nəticələr özünü doğruldub. Filtr lazım olan mühitdə və temperatur həddində işə düşərək faktiki olaraq bir virusa belə suda yaşamağa imkan vermir. Virusların məhvinə gəlincə, öncə çox da böyük olmayan, kiçik təhlükə yaratmağa qabil viruslar məhv olur. Sonda isə maddələr mübadiləsi nəticəsində bütün viruslar qırılır, beləliklə, su zərərli maddələrdən, patogenlərdən xilas olur.
İsrail alimləri gələcəkdə belə sutəmizləyən filtrlərdən içməli su problemi ilə üz-üzə qalan, mərkəzi su sistemi mükəmməl olmayan ölkələrdə istifadə ediləcəyinə inanırlar.
