“Qanun Prezident Administrasiyasını ləğv edə bilməz”
Milli Məclisin 25 aprel iclasında “Dövlət qulluğu haqqında” qanuna dəyişikliklər edilib. Novator.az-ın məlumatına görə, vəzifələrin təsnifatı bölümündə “Azərbaycan dövlətinin başçısının fəaliyyətini bilavasitə təmin edən Azərbaycan Respublikası Prezidentinin Administrasiyasında” sözlərinin “Azərbaycan dövlətinin başçısının fəaliyyətini bilavasitə təmin edən orqanda” sözləri ilə əvəz edilməsi çaşqınlıq yaradıb. Bəzi media orqanları yeniliyi Prezident Administrasiyasının ləğvi kimi təqdim edib.
Prezident Administrasiyasının qanunvericilik və hüquq ekspertizası məsələləri şöbəsinin müdiri Şahin Əliyev AZƏRTAC-a bununla bağlı açıqlama verib: “Qanun Prezident Administrasiyasını ləğv edə bilməz. Çünki Prezident Administrasiyasının yaradılması Azərbaycan Konstitusiyasının 109-cu maddəsində nəzərdə tutulub.
“Dövlət qulluğu haqqında” qanuna nəzərdə tutulan dəyişikliklərin mahiyyəti isə ondan ibarətdir ki, prezidentin fəaliyyətini təmin edən bir sıra qurumlar dövlət qulluqçuları təsnifatına salınsın. Misal üçün, prezidentin fəaliyyətinin təmin edilməsində yalnız Prezident Administrasiyası deyil, Prezidentin İşlər İdarəsi, Prezidentin Xüsusi Tibb Xidməti də iştirak edir. Ona görə də “Dövlət qulluğu haqqında” qanuna təklif olunan dəyişikliklərdə prezidentin fəaliyyətini təmin edən qurumlar cəm halda göstərilir.
Prezident Administrasiyasının adı qanunda öz əksini tapa bilər, çünki bu ad konstitusiyada təsbit olunub. Lakin Prezidentin İşlər İdarəsi və Prezidentin Xüsusi Tibb Xidmətinin adları qanuna salına bilməz. Bu halda prezidentin səlahiyyətləri məhdudlaşmış olardı. Konstitusiyaya görə, prezident qanunları poza bilməz və adını çəkdiyim qurumların mövcudluğu qanunda öz əksini tapsaydı, gələcəkdə zərurət olduqda prezident onları yenidən təşkil edə və ya adlarını dəyişdirə bilməzdi”.
