Kür çayında su sərfi artıb
Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Kür və Araz transsərhəd çaylarının, həmçinin onların transsərhəd qollarının çirklənmə vəziyyətini öyrənmək məqsədilə aprel ayında növbəti monitorinq keçirib.
Nəticələrə görə, aprelin ikinci ongünlüyündə Kür çayında suyun sərfi ayın birinci ongünlüyünə nisbətən saniyədə 102 kubmetr artaraq saniyədə 322 kubmetr təşkil edib.
Monitorinqin nəticələrinə əsasən, Gürcüstan və Ermənistan ərazilərindən təmizlənmədən birbaşa su obyektlərinə axıdılan məişət tullantıları və sənaye müəssisələrinin çirkab sularının təsiri nəticəsində Kür çayı və onun qollarında biogen maddələrin miqdarının normadan dəfələrlə artıq olduğu müşahidə edilib.
Suyun tərkibindəki spesifik çirkləndiricilərdən fenollar yol verilən qatılıq həddini Şıxlı-2 məntəqəsində 4.2, Ağstafaçayda 3, Ağstafaçay su anbarında isə 2 dəfə keçib.
Fenollar verilən qatılıq həddindən Araz çayı üzrə Horadizdə 1.6, I Şahsevəndə 1.3, Bəhramtəpədə isə 2 dəfə artıq olub.
Mis birləşmələri Kür və Araz çayları üzrə bütün məntəqələrdə norma daxilində tərəddüd edib.
Suyun oksigen rejimi bütün məntəqələrdə sanitar norma daxilində dəyişib.
