Yeni sərmayə hesabatı
Dövlət Statistika Komitəsi sərmayə hesabatı açıqlayıb. Novator.az-ın məlumatına görə, hesabatda qeyd olunur ki, 2017-ci ilin yanvar-mart aylarında ölkənin iqtisadi və sosial sahələrinin inkişafı üçün ayrılan 3 milyard 182,3 milyon manatın 2 milyard 214,2 milyon manatı neft sektoruna, 968,1 milyon manatı qeyri-neft sektoruna yönəldilib, ümumi sərmayənin 71,2 faizi bilavasitə tikinti-quraşdırma işlərinə sərf edilib.
Rəsmi hesabata əsasən, istifadə olunmuş vəsaitin 86,3 faizi məhsul istehsalı obyektlərinin, 9,1 faizi xidmət sahələri üzrə obyektlərin, 4,6 faizi isə ümumi sahəsi 385,5 min kvadratmetr olan yaşayış evlərinin payına düşür.
Əsas kapitala yönəldilmiş sərmayənin ümumi dəyərində müəssisə və təşkilatların vəsaitləri 75,2 faiz, bank kreditləri 10,6 faiz, büdcə vəsaitləri 8,5 faiz, əhalinin şəxsi vəsaitləri 4,7 faiz, büdcədənkənar fondların vəsaitləri 0,6 faiz, sair vəsaitlər isə 0,4 faiz təşkil edib.
Başqa bir hesabata görə, yanvar-martı aylarında tikinti müəssisələrinin yerinə yetirdiyi inşaat işlərinin 65,9 faizini tikinti, yenidənqurma və genişləndirmə, 9,3 faizini əsaslı təmir, 5 faizini cari təmir, 19,8 faizini isə sair tikinti işləri təşkil edib.
Dövlət Statistika Komitəsindən AZƏRTAC-a bildirilib ki, ümumi inşaat işlərinin 89,4 faizini qeyri-dövlət tikinti müəssisələri yerinə yetirib.
