Hərbi təlimlərdə istifadə olunacaq silah və texnika sərgiyə çıxarılıb
Azərbaycan və Türkiyə Silahlı Qüvvələrinin mayın 1-dən 5-dək keçirəcəyi birgə döyüş atışlı taktiki təlimlərində istifadə olunacaq silahların, hərbi və xüsusi texnika nümunələrinin sərgisi keçirilib. Mod.gov.az-ın 25 aprel məlumatına görə, mütəxəssislər şəxsi heyətə hərbi texnikanın istismarı, tətbiqi, döyüş və digər imkanları barədə bilgilər verib.
İki ölkə arasında imzalanmış hərbi əməkdaşlıq haqqında sazişə əsasən keçirilən birgə təlimlərdə şəxsi heyət, zirehli texnika, artilleriya qurğuları və minaatanlar, Hərbi Hava Qüvvələrinin döyüş və nəqliyyat helikopterləri, həmçinin qruplaşmanın havadan mühafizəsi məqsədilə müasir müdafiə kompleksləri ilə silahlanmış hava hücumundan müdafiə və zenit-raket bölmələri iştirak edəcək.
