Ermənistanın Konstitusiya Məhkəməsi müxalifətin şikayətinə baxır
Aprelin 25-də Ermənistanın Konstitusiya Məhkəməsi müxalif Konqres-Xalq Partiyası blokunun 2 aprel parlament seçkisindən şikayətini araşdırmağa başlayıb. Novator.az-ın məlumatına görə, iş üzrə cavabdehlər qismində Mərkəzi Seçki Komissiyası ilə prokurorluq və polisin nümayəndələri cəlb olunub. Konqres-Xalq Partiyası bloku prosesə Erməni Milli Konqresinin parlament fraksiyasının rəhbəri Levon Zurabyan və iki vəkillə çıxıb.
Konstitusiya Məhkəməsi iddianı baxış üçün qəbul edib.
Konqres-Xalq Partiyası bloku Konstitusiya Məhkəməsinə 2 aprel seçkisinin nəticələrinin etibarsız sayılaraq ləğv olunması üçün üz tutub. Parlament seçkisində blokun namizədlər siyahısına Erməni Milli Konqresinin lideri, sabiq prezident Levon Ter-Petrosyan başçılıq edib. Siyahıda ikinci Xalq Partiyasının lideri, deputat Stepan Dəmirçyanın adı olub. Qurum parlamentə düşə bilməyib.
Mərkəzi Seçki Komissiyası parlament seçkisinin nəticələrini aprelin 9-da təsdiqləyib. Prezident Serj Sərkisyanın sədrlik etdiyi hakim Respublika Partiyası 105 nəfərlik parlamentə 58 mandat qazanaraq təkbaşına hökumət qurmaq hüququ əldə edib.
İndiki hökumətdə Respublika Partiyasının ortağı olan Daşnaksütun Partiyası 7 mandat götürüb. Sarukyan bloku parlamentdə 31, “Çıxış” bloku 9 mandatla təmsil olunacaq.
Mərkəzi Seçki Komissiyası Konqres-Xalq Partiyası blokunun nəticələrin ləğvi ilə bağlı müraciətini təmin etməyib.
Yeni parlamentin səlahiyyəti aprelin 27-də qüvvəyə minməli idi. Konstitusiya Məhkəməsinə şikayətə görə bu məsələ təxirə düşüb.
İndiki parlamentdə Erməni Milli Konqresi 7 mandata sahibdir.
