Ekologiya və media: jurnalistlər üçün seminar keçirilib
Aprelin 20-23-də Bakıda jurnalistlər üçün “Cəmiyyətdə ekoloji münasibətlərin inkişafında medianın rolu” mövzusunda seminar keçirilib.
Seminarda paytaxt və regionlardan televiziyaları, internet və çap mediasını təmsil edən 10 jurnalist iştirak edib.
Tədbirdə ətraf mühitlə bağlı problemlərin dünya mediasında və yerli mediada işıqlandırılması, ekoloji problemlərin gündəmə gətirilməsində dövlət və media təşkilatlarının koordinasiyalı fəaliyyətinin vacibliyi, ekoloji qanunvericiliyin icra mexanizminə ictimai nəzarət formaları, ekoloji sivilizasiya və digər məsələlərdən bəhs edilib.
Seminarın əhatə etdiyi günlərdə Milli Məclisin eksperti Şamil Hüseynov, Milli Ekoloji Proqnozlaşdırma Mərkəzinin rəhbəri Telman Zeynalov, professor Qulu Məhərrəmli və “Rüzgar” Ekoloji Cəmiyyətinin eksperti Kamran Yaqubzadə jurnalistlər üçün təlimlər keçiblər.
Seminar zamanı Energetika, Ekologiya, Maarifçilik Mərkəzinin hazırladığı “Təhlükəli sənaye tullantıları” adlı sənədli film də jurnalistlərə təqdim olunub.
Seminarın təşkilində məqsəd ekoloji proseslərin kütləvi informasiya vasitələrində peşəkarlıqla işıqlandırılmasına, bu sahədə ixtisaslı jurnalist kadrların hazırlanmasına dəstək vermək, mövcud sahədəki bəzi neqativ tendensiyaların aradan qaldırılmasına təsir göstərməkdir.
Təlimlər zamanı jurnalistlər ekspertlərin iştirakı ilə interaktiv diskussiyalarda iştirak edərək onları maraqlandıran suallara da cavab ala biliblər.
Layihə Niderland Krallığı Xarici İşlər Nazirliyinin maliyyələşdirdiyi və Avrasiya Əməkdaşlıq Fondunun həyata keçirdiyi “Azərbaycanda İnsan Haqları, Demokratikləşmə və Yaxşı İdarəetmənin Təşviqi” Proqramı əsasında reallaşdırılır.
Təlimlər “İnternyus-Servis Azərbaycan” MMC ilə Avrasiya Əməkdaşlıq Fondu arasında başlanmış “Ətraf mühit məsələlərinin gündəmə gətirilməsi: səfərbər edilmiş media və vətəndaş cəmiyyəti səyləri” adlı xidmət çərçivəsində keçirilir.
