Cəmil Quliyev yenidən İctimai Teleradionun baş direktoru seçildi
Aprelin 25-də İctimai Televiziya və Radio Yayımları Şirkətinin Yayım Şurasının iclası keçirilib. Novator.az-ın məlumatına görə, iclasda İctimai Televiziya və Radio Yayımları Şirkətinin baş direktoru seçilib. Bu postu yenidən Cəmil Quliyev tutub. O, ilk dəfə 2013-cü il aprelin 23-də İctimai Televiziya və Radio Yayımları Şirkətinin baş direktoru seçilmişdi. Baş direktorun səlahiyyət müddəti 4 ildir.
25 aprel seçkisində Cəmil Quliyevin seçkidə 4 rəqibi olub: Tahir Paşazadə, İltifat Soltanov, Tahir Məmmədov, Afaq Ağayeva.
Cəmil Elşad oğlu Quliyev 1963-cü ildə Bakı şəhərində doğulub. 1984-cü ildə Moskva şəhərində Ümumittifaq Kinematoqrafiya İnstitutunu kinorejissor ixtisası üzrə bitirib, “Azərbaycanfilm” kinostudiyasında quruluşçu rejissor kimi çalışıb.
1987-ci ildən Azərbaycan Dövlət Mədəniyyət və İncəsənət Universitetində pedaqoji fəaliyyətə başlayıb, 1998-2006-cı illərdə kino və televiziya sənəti kafedrasının müdiri olub. Hazırda həmin universitetin professorudur.
Cəmil Quliyev 2006-cı ildən 2013-cü ilə qədər Azərbaycan Dövlət Film Fondunun direktoru, 2011-2013-cü illərdə “Mədəniyyət” telekanalının baş direktoru olub.
Əməkdar incəsənət xadimidir.
