Atmosferlə zəngin yeni planet aşkarlanıb
Astronomlar Yerdən 39 işıq ili uzaqlıqda yeni ekzoplanet kəşf ediblər.
Ekzoplanet – Günəşdən kənar planet deməkdir. Belə planetlər Günəş sistemindən qıraqda ulduz ətrafında fırlanır.
Novator.az-ın məlumatına görə, “Astronomical Journal” elmi nəşrində dərc olunmuş yazıda deyilir ki, alimlər yeni kəşf etdikləri ekzoplaneti “Gliese 1132b” adlandırıblar. Yerdən 1,4 dəfə böyük olan bu planet tamamilə atmosfer qatı ilə örtülüb, nəhəng və qatı qaz kütləsi altında gizlənib. Tapılan yeni, atmosferlə zəngin planetdə suyun, metan yataqlarının olduğu ehtimal edilir.
Alimlər planetdə saf atmosfer qatı tapılmasının elm üçün vacib olduğunu qeyd edərək gələcəkdə “Gliese 1132b” planetində həyatın olub-olmadığı ilə bağlı yeni tədqiqatların başlanacağını vurğulayıblar.
“Gliese1132b” barədə tədqiqatlara və müşahidələrə skeptik yanaşanlar da var. Onlar deyirlər ki, bu planetdə həyat ola bilməz, çünki onun üst qatında istilik selsi ilə 370 dərəcəyə çatır, həyat üçün isə maksimum hədd 120 dərəcə istidir.
Alimlər atmosferlə zəngin planeti ətraflı araşdırıb yeni nəticələr əldə edəcəklərinə böyük ümid bəsləyirlər.
