Poliqonda ağacəkmə aksiyası
İqtisadiyyat Nazirliyinin dəstəyi və “Təmiz Şəhər” ASC-nin təşkilatçılığı ilə Balaxanı Tullantıların Zərərsizləşdirilməsi Poliqonunda növbəti ağacəkmə aksiyası keçirilib. İqtisadiyyat Nazirliyi və “Təmiz Şəhər” ASC-nin əməkdaşlarının iştirak etdiyi aksiyada 1000 ədəd ağac əkilib.
İqtisadiyyat Nazirliyinin mətbuat xidmətindən AZƏRTAC-a bildiriblər ki, ağaclar əkilən ərazidə xüsusi suvarma sistemi qurulub və daim “Təmiz Şəhər” ASC-nin əməkdaşlarının nəzarətində olacaq, onlara qulluq ediləcək: “Poliqonun ərazisi 2009-cu ilədək Bakının məişət tullantılarının açıq şəkildə atıldığı sahələr idi. Tullantıların üfunəti, yanma nəticəsində yaranan tüstü şəhərə yayılırdı. “Təmiz Şəhər” ASC fəaliyyətə başladıqdan sonra isə məişət tullantılarının alışmasının və tüstülənmənin qarşısı tamamilə alındı, bütün məişət tullantıları xüsusi geomembran qatı ilə örtüldü. 120 hektar əraziyə malik sanitar poliqonda lazımi infrastruktur yaradıldı və tullantıların düzgün qəbuluna başlanıldı.
Hazırda tullantılardan ayrılan çirkab sular filtrlər vasitəsilə suvarma üçün istifadə olunan texniki suya çevrilir, tullantılardan alınan qazdan isə elektrik enerjisi əldə olunur”.
Poliqon ərazisində yaşıllaşdırma işlərinin aparılması artıq ənənəyə çevrilib və bir neçə ildir ki, İqtisadiyyat Nazirliyinin və “Təmiz Şəhər”in əməkdaşları burada ağacəkmə aksiyaları keçirirlər. Balaxanı Tullantıların Zərərsizləşdirilməsi Poliqonunda indiyədək 10 mindən artıq ağac əkilib.
