Hər sakin ərzağa 138 manatdan çox xərcləyib
2017-ci ilin yanvar-mart aylarında istehlak məhsullarının 11,2 faizini hüquqi şəxs statuslu müəssisələr, 53,4 faizini fərdi sahibkarlar satıb, məhsulların 35,4 faizi isə bazar və yarmarkalarda alınıb.
Dövlət Statistika Komitəsi bildirir ki, üç ayda əhalinin bir nəfərinə düşən orta aylıq pərakəndə ticarət dövriyyəsi 272,4 manat və ya 2016-cı ilin müvafiq göstəricisindən nominal ifadədə 36,5 manat çox olub.
Ticarət şəbəkəsində bir ölkə sakini orta hesabla hər ay 138,8 manatlıq ərzaq məhsulları, içkilər və tütün məmulatları, 133,6 manatlıq qeyri-ərzaq məhsulları alıb.
Dövlət Statistika Komitəsindən AZƏRTAC-a verilən başqa bir məlumata görə, yanvar-mart ayları ərzində əhaliyə göstərilən ödənişli xidmətlərin dəyəri 2016-cı ilin eyni dövrü ilə müqayisədə real ifadədə 1,4 faiz azalaraq 1 milyard 915,9 milyon manat olub. Hesabat dövründə hər bir ölkə sakini orta hesabla 197,5 manatlıq və ya ötən ilin müvafiq dövrü ilə müqayisədə nominal ifadədə 11,6 manat çox müxtəlif ödənişli xidmətlərdən istifadə edib.
