Çempionlar Liqasının yarımfinalçıları: kimin muzeyi zəngindir?
2016-2017 mövsümündə UEFA Çempionlar Liqasının qalibi olmağa İspaniyanın “Real” və “Atletiko”, Fransanın “Monako”, İtaliyanın “Yuventus” komandaları iddialıdır. May ayında keçiriləcək yarımfinal matçlarında “Real”la “Atletiko”, “Monako” ilə “Yuventus” üz-üzə gələcək.
Novator.az yarımfinalçı komandaların əvvəlki göstəricilərinə nəzər salıb. “Real” 11 dəfə Çempionlar Liqasının qalibi olub. 1991-1992 mövsümünədək Çempionlar kuboku adlanmış turnirdə Madrid təmsilçisi daha 3 dəfə finalda oynayıb. Finaldakı uğurlar 1956, 1957, 1958, 1959, 1960, 1966, 1998, 2000, 2002, 2014, 2016-cı illərə təsadüf edib. 1962, 1964, 1981-ci illərin final görüşləri isə “Real” üçün uğursuz olub.
“Yuventus” göstəricilərə görə indiki yarımfinalçılar arasında ikincidir. Turin təmsilçisi 1985 və 1996-cı illərdə titula sahib çıxıb, 1973, 1983, 1997, 1998, 2003 və 2015-ci illərdə isə finalda büdrəyib.
“Atletiko” və “Monako” Çempionlar Liqasında qalib olmayıblar. Madrid klubu 3 dəfə (1974, 2014, 2016-cı illər), fransızlar 1 dəfə (2004-cü il) finala qədər gəliblər.
