Təlimlərdə növbəti mərhələ
Azərbaycan Silahlı Qüvvələrinin təlimlərindən yeni rəsmi bilgilər. Mod.gov.az bildirir ki, təlimlərin növbəti mərhələsində qoşunların yerləşdikləri rayonlardan açılma həddinə çıxmaq üzrə tapşırıqları icra olunub. Artilleriya, hava hücumundan müdafiə vasitələri, aviasiya və xüsusi növ qoşunların digər bölmələri tapşırıqları təlimin şərtlərinə uyğun yerinə yetiriblər.
Məlumata görə, təlimlərin bu mərhələsinin əsas xüsusiyyəti qoşunların qaranlıq vaxtı hərəkətinin təşkili və həyata keçirilməsidir, bu da işığı maskalama (gizlətmə) üzrə əlavə tədbirlərin görülməsini tələb edir.
Təlimlərdə əsas diqqət həmçinin tapşırıqların dəqiq və vaxtında icra edilməsi məqsədilə qoşunların hərtərəfli təminatına, komendant və mühəndis xidmətlərinin fəaliyyətinə yönəldilib.
Müdafiə naziri general-polkovnik Zakir Həsənov isə qoşun növlərinin komandanları, birlik komandirləri və müvafiq vəzifəli şəxslərin dinamik dəyişən vəziyyət və qəbul edilən qərarlara dair məruzələrini dinləyib. Qarşılıqlı fəaliyyətin effektivliyinin artırılması və qoşunların idarə olunması üzrə göstərişlər verilib.
Müdafiə Nazirliyinin rəhbərliyi hərbi hissələrin və bölmələrin ərazidə praktiki fəaliyyətini yoxlayıb. Əsas diqqət silahlanmaya yeni qəbul edilmiş silah və hərbi texnikanın tətbiqi ilə taktiki fəaliyyətlərin yeni üsullarına yönəldilib.
Silahlı Qüvvələrin genişmiqyaslı təlimləri aprelin 16-da başlayıb. Aprelin 21-dək davam edəcək təlimlərə 30 min nəfərədək şəxsi heyət, 250-dən artıq tank və zirehli texnika, 200-dək müxtəlif çaplı raket və artilleriya qurğusu, reaktiv yaylım atəş sistemi və minaatan, 25 ədəd müxtəlif təyinatlı döyüş aviasiyası, eləcə də yeni növ radioelektron kəşfiyyat vasitələri və pilotsuz uçuş aparatları cəlb olunub.
