Ekologiya: nazirlik cəza statistikası yayıb
1-15 aprel arası araşdırmalar aparan Ekologiya və Təbii Sərvətlər Nazirliyi bildirir ki, atmosfer havasının, su və torpaq ehtiyatlarının, yerin təkinin, fauna və floranın mühafizəsi, o cümlədən ətraf mühitə məişət və istehsalat tullantılarının yerləşdirilməsi sahəsində yol verilmiş qanun pozuntularına görə 142 akt və protokol tərtib olunub, nöqsanların aradan qaldırılması üçün 34 müddətli məcburi göstəriş verilib.
44 iş üzrə 100650 manat məbləğində inzibati cərimə tətbiq edilib, ətraf mühitə dəymiş ziyana görə 20 iş üzrə 50349,75manat məbləğində iddia qaldırılıb, ətraf mühitə tullantıların atılmasına və axıdılmasına görə hüquqi və fiziki şəxslərə 245 iş üzrə 47306,74 manat məbləğində ödəmə tətbiq edilib.
Tədbir görülməsi üçün hüquq mühafizə orqanlarına və icra qurumlarına 26, məhkəmələrə isə 2 iş göndərilib.
Novator.az xatırladır ki, aprel ayında prezident İlham Əliyevin göstərişi ilə Bakının Yasamal rayonunda, Mətbuat prospektində yerləşən “Ovçular evi” ərazisində yaşayış binasının tikintisi dayandırılıb. Buna səbəb tikinti aparan şirkətin ərazidəki 54 ağacı qanunsuz kəsməsi və ərazidəki yaşıllığı tamamilə məhv etməsidir.
Əraziyə baxış keçirən Ekologiya və Təbii Sərvətlər Nazirliyi ağacların məhv edilməsi barədə akt tərtib edib, yaşayış binasının tikintisini həyata keçirən şirkət 130 min manat məbləğində cərimələnib və fakt üzə cinayət işi açılıb.
