Qəzalar azalsa da, qurbanlar artıb
Baş Dövlət Yol Polisi İdarəsinin aprelin 18-də yayılan rəsmi hesabatına görə, 2017-ci ilin 3 ayı ərzində ölkədə 407 yol-nəqliyyat hadisəsi qeydə alınıb, 162 nəfər həlak olub. 2016-cı ilin müvafiq dövrü ilə müqayisədə qəzaların sayı 2,9% azalıb, həlak olanların sayı 19 nəfər artıb.
Qeyd olunur ki, üç ayda Bakı şəhəri ərazisində 140 yol-nəqliyyat hadisəsində 44 nəfər həlak olub. 2016-cı illə müqayisədə yol-nəqliyyat hadisələrinin sayında 4,8%, həlak olanların sayında 13 nəfər artım var.
Ölkə üzrə qeydə alınmış yol-nəqliyyat hadisələrinin 32,4%-i ötmə və qarşıdan gələn nəqliyyatın yoluna çıxma, 30,2%-i nəqliyyat vasitələrinin yüksək sürətlə idarə olunması, 12%-i yol ayrıclarını keçmə qaydalarının pozulması, 1,7%-i nəqliyyat vasitələrinin sərxoş vəziyyətdə idarə olunması səbəbindən baş verib.
Yol-nəqliyyat hadisələrinin 47,9%-ni piyadaların vurulması təşkil edib, nəticədə 66 piyada həlak olub.
