İnvestisiyalarda artım, büdcə kəsir, kreditlərdə azalma
Dövlət Statistika Komitəsi bəzi iqtisadi göstəriciləri açıqlayıb. Novator.az-ın məlumatına görə, rəsmi hesabatda qeyd olunur ki, 2017-ci ilin yanvar-mart aylarında əsas kapitala 3 milyard 182,3 milyon manat məbləğində, yaxud 2016-cı ilin müvafiq dövrü ilə müqayisədə 3 faiz çox vəsait yönəldilib. Vəsaitlərin 33,8 faizini daxili vəsaitlər təşkil edib.
Hesabata əsasən, 2017-ci ilin yanvar-mart aylarında dövlət büdcəsinə 3 milyard 591,5 milyon manat vəsait daxil olub, büdcədən 3 milyard 912,7 milyon manat vəsait xərclənib, büdcənin icrasında yaranmış 321,2 milyon manatlıq kəsir ümumi daxili məhsulun 2,1 faizi səviyyəsində olub.
Dövlət Statistika Komitəsi Mərkəzi Bankın məlumatlarına əsaslanıb bildirir ki, 2017-ci il mart ayının 1-nə ölkənin bank və bank olmayan kredit təşkilatlarının kredit portfeli milli valyuta ekvivalentində 15 milyard 878,6 milyon manat təşkil edib. Kredit portfeli 2016-cı il mart ayının 1-i ilə müqayisədə 21,9 faiz azalıb. Ödəmə vaxtı keçmiş kreditlərin məbləği ümumi kredit portfelinin 9,8 faizinə bərabər olub.
Əhalinin banklardakı əmanətlərinin milli valyuta ekvivalentində məbləğinin 2017-ci il mart ayının 1-nə 7 milyard 101,8 milyon manat olduğu bildirilir.
