İngilislər növbədənkənar seçkiyə gedir
İyunun 8-i Böyük Britaniyada növbədənkənar parlament seçkisi keçiriləcək və bundan sonra yeni Nazirlər Kabineti formalaşdırılacaq. Novator.az-ın məlumatına görə, Böyük Britaniyanın baş naziri Tereza Mey aprelin 18-də belə açıqlama verib.
Tereza Mey qərarın Nazirlər Kabinetinin bugünkü iclasında qəbul edildiyini deyib: “Biz yeni parlament seçkisinin iyunun 8-də keçirilməsini qərara aldıq. Ölkəyə güclü hökumət lazımdır”.
Növbəti parlament seçkisi 2020-ci ildə keçirilməli idi.
Ötən il iyunun 23-də Böyük Britaniyada ölkənin Avropa İttifaqında qalıb-qalmamasını müəyyənləşdirən referendum keçirilib. Referenduma qatılanların çoxu Britaniyanın Avropa İttifaqından çıxmasına səs verib. Avropa İttifaqında qalmaq tərəfdarı olan baş nazir Devid Kemeron məğlubiyyətə görə istefaya gedib.
Referenduma qədər Tereza Mey də Böyük Britaniyanın Avropa İttifaqında qalmasına tərəfdar olub. Amma referendumdan sonra o bəyan edib ki, xalqın iradəsini reallaşdırmaqla məşğul olacaq. Artıq Böyük Britaniyanın Avropa İttifaqından çıxması prosesi başlayıb.
Ötən il iyulun 13-də Tereza Mey baş nazir postuna təyin edilib.
60 yaşlı Tereza Mey 2010-cu ildən Devid Kemeron hökumətində qadın və bərabərlik məsələləri naziri postunu tutub, sonradan daxili işlər naziri olub. 1997-ci ildən İcmalar Palatasının deputatıdır.
Mühafizəkarlar Partiyasına 1997-ci ildə qoşulub, 2016-cı il iyulun 11-də qurumun lideri seçilib.
