Hava qarışacaq
Aprelin 19-da hava qarışıq olacaq. Ekologiya və Təbii Sərvətlər Nazirliyinin mətbuat xidmətindən Novator.az-a bildiriblər ki, Milli Hidrometeorologiya Departamentinin proqnozuna görə, Bakıda və Abşeron yarımadasında hava şəraiti dəyişkən buludlu olacaq, arabir tutulacaq, axşam qısamüddətli yağış yağacaq. Səhər bəzi yerlərdə zəif duman, çiskin olacaq. Mülayim cənub-qərb küləyi əsəcək, günün ikinci yarısında arabir güclənən şimal-qərb küləyi ilə əvəzlənəcək.
Havanın temperaturunun Abşeron yarımadasında gecə 8-12, gündüz 20-25, Bakıda gecə 9-11, gündüz 22-24 dərəcə isti olacağı gözlənilir.
Rayonlarda bəzi yerlərdə hava şəraiti qısa müddətə qeyri-sabit keçəcək, şimşək çaxacaq, arabir yağış yağacaq, dolu düşəcək. Qərb küləyi əsəcək, ayrı-ayrı yerlərdə arabir güclənəcək. Çaylarda sululuğun artacağı ehtimal edilir.
Rayonlarda havanın temperaturunun gecə 7-12, gündüz 18-23, dağlarda gecə 2-7, gündüz 8-13 dərəcə isti olacağı gözlənilir.
Milli Hidrometeorologiya Departamenti tibbi-meteoroloji proqnozunu da açıqlayıb. Bildirilir ki, aprelin 19-da Abşeron yarımadasında atmosfer təzyiqinin təzadlı dəyişməsi, arabir güclənən gilavar küləyinin xəzri küləyinə keçməsi bəzi meteohəssas insanlarda narahatlıq yaratsa da, aprelin 20-də meteoroloji amillərin zəif və mülayim tərəddüdü meteohəssas insanlar üçün əsasən əlverişlidir.
