“Dünya tam alternativ enerjiyə keçə bilər”
Bərpa Olunan Enerji Siyasəti Şəbəkəsi (REN21) hesab edir ki, dünya tamamilə alternativ enerji mənbələrinə keçə bilər.
Novator.az-ın məlumatına görə, şəbəkənin “Yeni alternativ enerji qaynaqları və 100 faiz bərpa olunan enerji mənbələri ətrafında müzakirələr” adlı geniş hesabatında müxtəlif ölkələrdən olan 114 alimin apardığı araşdırmalara istinadla bildirilir ki, 2050-ci ilədək dünyanın böyük bir hissəsini bərpa olunan enerji ilə təmin etmək mümkündür.
Hesabatda ekoloji təmiz mühitin yaradılması, alternativ enerji resurslarının artırılması yollarından, həmçinin bu işə mane olan amillərdən bəhs edilir, xüsusilə qlobal inhisarçılıqdan qurtulmağın əhəmiyyəti vurğulanır.
Hesabatda deyilir ki, alternativ mənbələrdən enerji almaq üçün işlək layihələrə yatırımların qoyulması geniş təşviq edilməlidir. Hesabat müəllifləri şübhə etmirlər ki, bərpa olunan enerji emalı getdikcə daha gəlirli bir biznes sahəsinə çevriləcək.
Hesabata görə, hazırda dünyada 100 milyon adam alternativ elektrik enerjisindən yararlanır.
