Yevlax səfərinin ikinci günü: müşavirə keçirilir
Aprelin 17-də prezident İlham Əliyev Yevlax şəhərində Aran Regional İnkişaf Mərkəzinə baş çəkib. AZƏRTAC-ın məlumatına görə, dövlət başçısı mərkəzdə təşkil edilmiş ixrac yönümlü qeyri-neft məhsullarının sərgisi ilə tanış olub.
İqtisadiyyat naziri Şahin Mustafayev dövlət başçısına bildirib ki, sərgidə qeyri-neft məhsulları ixrac edən 60-dan çox şirkətin 450-yə yaxın çeşiddə şərab, çay, meyvə-tərəvəz, mineral sular, şirələr, bal, şirniyyat, tekstil və digər məhsulları nümayiş olunur. Bu məhsullar daxili tələbata yönəldilməklə yanaşı Avropa, MDB ölkələri, ABŞ, Birləşmiş Ərəb Əmirlikləri, Çin, Türkiyə, İran, Səudiyyə Ərəbistanı və digər ölkələrə ixrac edilir.
Bunun ardınca prezident İlham Əliyevin sədrliyi ilə qeyri-neft ixracatçılarının respublika müşavirəsi başlayıb. Dövlət başçısı müşavirəni giriş nitqi ilə açıb.
İlham Əliyevin Yevlaxa səfəri aprelin 16-da başlayıb. Prezident Mingəçevir-Bəhramtəpə avtomobil yolunun Mingəçevir-Mingəçevir stansiyası hissəsinin, Salahlı-Balçılı-Ağqıraqlı-Varvara-Cırdaxan avtomobil yolunun açılışlarında iştirak edib.
Prezident yenidənqurmadan çıxmış Varvara Su Elektrik Stansiyasının açılışına, Varvara balıqartırma müəssisəsinin açılışına da qatılıb.
