Üç ayda 250-yə yaxın dövlət əmlakı özəlləşdirilib
Əmlak Məsələləri Dövlət Komitəsində yanvar-mart ayları ərzində görülmüş işlər və qarşıda duran vəzifələrə dair geniş müşavirə keçirilib. Aprelin 17-də yayılan rəsmi məlumata görə, müşavirədə qeyd edilib ki, 2017-ci ilin ilk rübündə ümumilikdə 250-yə yaxın kiçik dövlət müəssisə və obyekti, qeyri-yaşayış sahəsi, yarımçıq tikililər və nəqliyyat vasitələri, habelə müəssisə və obyektin yerləşdiyi torpaq sahəsi, səhmdar cəmiyyətləri özəlləşdirilib, 63 qeyri-yaşayış və torpaq sahəsi icarəyə verilib.
Hesabata əsasən, torpaqların səmərəli istifadə olunması və mühafizəsinə nəzarət məqsədilə Bakı və regionlarda monitorinqlər və reydlər davam etdirilib. 140 hal üzrə inzibati protokollar tərtib edilib, 85 hal üzrə inzibati tənbeh qərarları qəbul edilib.
Müşavirədə qeyd olunub ki, ilk 3 ay ərzində keçirilmiş 9 “Kütləvi çıxarış” kampaniyasının 2-si paytaxtın rayonlarında, 7-si isə müxtəlif şəhər və rayonlarda baş tutub, bu xidmət növündən 700-ə yaxın vətəndaş yararlanıb.
2017-ci il ərzində ölkə üzrə 44 minə yaxın daşınmaz əmlak obyekti üzərində mülkiyyət hüquqları qeydiyyata alınıb.
İlin ilk rübündə regionlarda 3 vətəndaş qəbulu keçirilib, 29 vətəndaşın müraciətlərinə baxılıb.
