Tehranda yeni görüş
İrana rəsmi səfərini davam etdirən Azərbaycanın müdafiə naziri Zakir Həsənov aprelin 17-si Tehranda İslam Şurası Məclisinin (ölkə parlamenti) sədri Əli Laricani ilə görüşüb. Görüşdə regionda təhlükəsizlik məsələlərinə toxunan Zakir Həsənov Dağlıq Qarabağ münaqişəsinin tənzimlənməsi ilə bağlı aparılan danışıqlar, qoşunların qarşıdurma xəttində son vaxtlar baş vermiş hadisələr barədə məlumat verib.
Mod.gov.az-ın məlumatına görə, Əli Laricani İranın Azərbaycanın müstəqilliyini, suverenliyini və ərazi bütövlüyünü daim dəstəklədiyini, münaqişənin sülh yolu ilə, beynəlxalq hüququn normaları və prinsipləri çərçivəsində həllinin tərəfdarı olduğunu vurğulayıb.
Tərəflər Azərbaycanla İran arasında hərbi və hərbi-texniki sahələrdə əməkdaşlığın inkişaf perspektivlərini, qarşılıqlı maraq doğuran regional, qlobal və digər məsələləri müzakirə ediblər.
