Şikayət yeni parlamentin səlahiyyət gününü dəyişir
Ermənistanda 2 aprel parlament seçkisində iştirak etmiş Konqres-Xalq Partiyası bloku nəticələrin etibarsız sayılaraq ləğv olunması üçün Konstitusiya Məhkəməsinə müraciət edib. Blokun namizədlər siyahısına Erməni Milli Konqresinin lideri, sabiq prezident Levon Ter-Petrosyan başçılıq edib. Siyahıda ikinci Xalq Partiyasının lideri Stepan Dəmirçyanın adı olub. Qurum parlamentə düşə bilməyib.
Novator.az bildirir ki, Mərkəzi Seçki Komissiyası parlament seçkisinin nəticələrini aprelin 9-da təsdiqləyib. Prezident Serj Sərkisyanın sədrlik etdiyi hakim Respublika Partiyası 105 nəfərlik parlamentə 58 mandat qazanaraq təkbaşına hökumət qurmaq hüququ əldə edib.
İndiki hökumətdə Respublika Partiyasının ortağı olan Daşnaksütun Partiyası 7 mandat götürüb. Sarukyan bloku parlamentdə 31, “Çıxış” bloku 9 mandatla təmsil olunacaq.
Mərkəzi Seçki Komissiyası Konqres-Xalq Partiyası blokunun nəticələrin ləğvi ilə bağlı müraciətini təmin etməyib.
Yeni parlamentin səlahiyyəti aprelin 27-də qüvvəyə minməli idi. Konstitusiya Məhkəməsinə şikayətə görə səlahiyyət günü dəyişəcək.
