“Qarabağ”ın 5-ci zəfəri
Azərbaycanın milli futbol çempionatında qalib turnir bitməmiş müəyyənləşib. Aprelin 16-sı premyer liqanın 26-cı turunda “İnter”i 3:0 hesabı ilə udan “Qarabağ” 2016-2017 mövsümünün sonuna 2 tur qalmış ən yaxın izləyicisi “Qəbələ”ni 7 xal qabaqlayaraq çempion olub.
Novator.az bildirir ki, bu, “Qarabağ”ın 5-ci çempionluğudur. 2013-2014, 2014-2015, 2015-2016 mövsümlərində çempion olmuş Ağdam təmsilçisinin ilk zəfəri 1993-cü ilə təsadüf edir.
“Qarabağ”ın 1996-1997 mövsümündə mübahisəli çempionluğu da var. O vaxt Azərbaycan çempionatında əsas komandaların nəticələrinə yeniyetmələrin yarışlarının nəticələri də əlavə olunub. Ümumi hesabda “Qarabağ” 1-ci olsa da, UEFA ancaq əsas komandaların göstəricilərini nəzərə alaraq bu yarışın qalibi “Neftçi”ni çempion kimi tanıyıb.
Azərbaycanın milli futbol çempionatı 1992-ci ildən keçirilir. İndiyədək 8 dəfə “Neftçi”, 3 dəfə “Kəpəz”, 2 dəfə “Şəmkir”, 2 dəfə “Bakı”, 2 dəfə “İnter”, 1 dəfə “Turan”, 1 dəfə “Xəzər Lənkəran” çempion olub.
2001-2002 mövsümü yarımçıq qalıb, növbəti mövsüm isə çempionat keçirilməyib.
