Hansı ölkələrdən xaricə daha çox səfər edirlər?
2016-cı ildə turist səfərlərinə çəkilmiş xərclərin həcminə görə Çin 1-ci yerdə dayanıb. Dünya Turizm Təşkilatının (UNWTO) aprelin 17-də yaydığı hesabatda belə deyilir.
Novator.az bildirir ki, hesabata əsasən, 2016-cı ildə Çindən xaricə səfər edənlərin xərcləri 12% artaraq 261 milyard dollara yüksəlib. Ötən il bu ölkədə səyahətə çıxanların sayı da 6% artaraq 135 milyon nəfər olub.
Xarici səfərlərdə çəkilmiş xərclərin reytinq cədvəlində ikinci yerdə ABŞ dayanıb. Ötən il bu ölkədən xaricə səfər edənlərin xərcləri 2015-ci illə müqayisədə 8% artaraq 122 milyard dollar təşkil edib.
Reytinq cədvəlinin ilk beşliyinə Almaniya, Böyük Britaniya və Fransa da düşüb.
Dünya Turizm Təşkilatının hesabatına görə, rusiyalı turistlər 2016-cı ildə xarici səfərlərdə 24 milyard ABŞ dolları xərcləyib. Bu, 2015-ci illə müqayisədə üçdə bir azalma, 2014-cü illə müqayisədə iki dəfə azalma deməkdir.
Hesabatda qeyd olunur ki, Rusiya əhalisi 2015-ci ildə 2014-cü illə müqayisədə xarici səfərlər zamanı xərclərini 30% azaldıb. 2014-cü ildə də xərclərin azaldığı müşahidə olunub, 2013-cü illə müqayisədə 6% enmə qeydə alınıb.
Dünya Turizm Təşkilatı mənfi dinamikanı iqtisadi faktorlarla, habelə milli valyuta kursunun enməsi ilə əlaqələndirir. Eyni vəziyyət Braziliyada da müşahidə olunub.
