Fransa: iki namizədin şansları bərabərləşib
Fransada prezident seçkisi ilə bağlı yeni sorğunun nəticələri açıqlanıb. Novator.az-ın məlumatına görə, “OpinionWay” Sosioloji Xidmətin aprelin 17-də keçirdiyi sorğu prezident seçkisinin ilk turunda (23 aprel) Milli Cəbhənin lideri Marin Le Penin və “İrəli” hərəkatının lideri, sabiq iqtisadiyyat naziri Emmanuel Makronun eyni sayda səs alacağını göstərir.
Təşkilatın məlumatına əsasən, sorğuya qatılanların 22%-i ilk turda Le Pen və Makrona səs verəcəyini bəyan edib.
Reytinq cədvəlinin sonrakı pilləsində müxalif sağ və mərkəzçi partiyaların namizədi, sabiq baş nazir Fransua Fiyon gəlir. O, respondentlərin 21%-nin səsini alıb.
“OpinionWay” şirkətinin sorğusuna əsasən, mayın 7-də keçiriləcək ikinci tur üçün Makron liderlik edir. Onu seçicilərin 64%-i dəstəkləməyə hazırdır. Respondentlərin 36%-i isə ikinci turda Le Peni dəstəkləyəcəyini bəyan edib.
17 aprel sorğusuna görə, Fiyon ikinci tura çıxsa, seçicilərin 60%-nin, Le Pen isə 40%-nin səsini alacaq.
