Bu il 500 hektara yaxın ərazinin yaşıllaşdırılması planlaşdırılır
Ekologiya və Təbii Sərvətlər Nazirliyinin “Azərbaycan Yaşıllaşdırma və Landşaft Quruluşu” Açıq Səhmdar Cəmiyyətinin (Azəryaşlandşaft ASC) fəaliyyət dairəsinə 4044 hektar ərazi daxildir.
Cəmiyyətin sədri Ramik Əşrəfov AZƏRTAC-a açıqlamasında bildirib ki, 2017-ci ildə 500 hektara yaxın ərazinin yaşıllaşdırılması planlaşdırılıb. Artıq 75 hektar sahədə əkin işləri aparılıb. Mövsümün sonuna kimi 100 hektar ərazidə yaşıllıqların salınacağı gözlənilir. Əsasən yaz-payız mövsümündə aparılan əkin işləri zamanı qeyri-meşə fondu torpaqlarında aqromeşə massivləri salınır. Yaşıllaşdırma zamanı zeytun, badam, nar, tut kimi yerli ağac növlərinə üstünlük verilir. Xarici ölkələrdən isə püstə, innab ağacları gətirilir.
Ötən il 150 hektar ərazidə yaşıllaşdırma işləri həyata keçirilib. Bu zaman zeytun, badam, iydə ağaclarına daha çox üstünlük verilib.
Xatırladaq ki, “Azəryaşlandşaft” ASC Azərbaycan Respublikasında qeyri-meşə fondu torpaqlarında, o cümlədən magistral avtomobil yollarının mühafizə zolaqlarında yaşıllıqların salınması, bərpası və becərilməsi sahəsinin inkişafına cavabdeh qurumdur. Cəmiyyət səkkiz yaşıllaşdırma idarəsini özündə birləşdirir.
