Azərbaycanda 1554 hemofiliyalı xəstə var
Azərbaycanda hemofiliyadan əziyyət çəkən 1554 xəstə dispanser qeydiyyatındadır. Səhiyyə Nazirliyi bildirir ki, xəstələr dövlət proqramı çərçivəsində pulsuz dərman vasitələri ilə təmin edilir və müalicə alırlar.
Hazırda dünyada 400 mindən çox hemofiliyalı xəstə var.
Hemofiliya müxtəlif qanaxmalarla xarakterizə olunan ağır irsi qan xəstəliyidir. Xəstəliyi qanın laxtalanma prosesində pozuntular yaradır, qanın oynaq və yumşaq toxumalara yığılması əlilliyə, bəzən də ölümə səbəb olur. Vaxtında aparılan müalicə ölüm təhlükəsindən xilas etməklə yanaşı əlilliyin qarşısını da alır.
Qafqazda ilk hemofiliya mərkəzi 1973-cü ildə Azərbaycanda yaradılıb, hazırda Respublika Klinik Xəstəxanasının hematologiya şöbəsinin nəzdində yerləşən mərkəzdə hər il 50-60 nəfərdən çox hemofiliyalı xəstələrdə müxtəlif böyük və kiçik cərrahi əməliyyatların həyata keçirilir.
Azərbaycanda “Hemofiliya və talassemiya irsi qan xəstəliklərinə düçar olmuş şəxslərə qayğı” dövlət proqramı 2005-ci ildə qəbul olunub.
Səhiyyə Nazirliyi bildirir ki, Azərbaycan da daxil olmaqla dünya ölkələrinin 20 faizi hemofiliyalı xəstələri lazımi dərman preparatları ilə təmin edir.
