Ticarət tərəfdaşları ilə alış-verişdə nə yeniliklər var?
Bu ilin yanvar-mart aylarında Azərbaycanın MDB ölkələrinə ixracı 2016-cı ilin ilk üç ayı ilə müqayisədə 51,42 faiz artıb. Avropa İttifaqı ölkələrinə ixracda 18,46 faiz, digər ölkələrə ixracda 100,04 faiz artım olub.
MDB ölkələrindən idxal 2016-cı ilin yanvar-mart ayları ilə müqayisədə 39,89 faiz artıb. Avropa İttifaqından idxalda 31,39 faiz, digər ölkələrdən idxalda 27,11 faiz azalma var.
2017-ci ilin yanvar-mart aylarında Azərbaycanın əsas xarici ticarət tərəfdaşı İtaliya olub. Novator.az-ın məlumatına görə, Dövlət Gömrük Komitəsi bildirir ki, bu ölkə ilə ticarətin həcmi ümumi dövriyyənin 14,57 faizini təşkil edib. Türkiyə 13,42 faizlə ikinci, Rusiya 9,14 faizlə üçüncü ölkədir.
İxracda əsas ölkələrin siyahısında 20,67 faizlə İtaliya öndə gəlir. İdxalda əsas ölkə isə Rusiyadır (19,65 faiz).
Rəsmi hesabata görə, üç ayda Rusiyaya ixrac 75,39 faiz, Gürcüstana ixrac 24,74 faiz, Türkiyəyə ixrac 423,85 faiz artıb. İrana ixrac üzrə isə 55,59 faiz azalma var.
İspaniyaya ixrac 180,4 faiz, İtaliyaya ixrac 46,38 faiz artıb, Fransaya ixrac 50,56 faiz azalıb.
ABŞ-a ixrac üzrə ötən ilin yanvar-mart ayları ilə müqayisədə 97,08 faiz azalma qeydə alınıb.
