Kür çayının Şirvan məntəqəsində suyun səviyyəsi 24 santimetr artıb
Ekologiya və Təbii Sərvətlər Nazirliyinin Milli Hidrometeorologiya Departamentinin məlumatına görə, ötən günlərdə temperatur rejiminin nisbətən yüksək olması və dağlıq, qismən yüksək dağlıq ərazilərdə qarın tədricən əriməsi səbəbindən bəzi çayların suyu artıb.
Böyük Qafqazın Quba-Xaçmaz bölgəsi çaylarında sululuq ongünlük normanın 130-220, Kiçik Qafqazın çaylarında 70-110, Lənkəran-Astara bölgəsi çaylarında isə 30-40 faizini təşkil edir.
Tranzit çaylardakı vəziyyəti barədə də məlumat verilib. Kür çayının Qıraqkəsəmən məntəqəsində aprel ayının 14-də suyun səviyyəsində 5 santimetr azalma müşahidə edilib. Məntəqədə su sərfi hazırda ongünlük normanın 33 faizini təşkil edir.
Qanıx çayının Əyriçay məntəqəsində suyun səviyyəsində dəyişiklik müşahidə edilməyib. Bu məntəqədə hazırda su sərfi ongünlük normanın 50 faizini təşkil edir.
Kür çayının aşağı axınında aprelin 14-dən etibarən suyun səviyyəsində artım var. Kür çayının Şirvan məntəqəsində 24, Salyanda 6, Bankədə 2, Araz çayının Novruzlu məntəqəsində 4 santimetr artım, Surrada isə 2 santimetr azalma qeydə alınıb.
Hazırda Surra məntəqəsində suyun səviyyəsi 408, Şirvanda 271, Salyanda 210, Bankədə 185, Araz çayının Novruzlu məntəqəsində isə 107 santimetrdir.
