Güzəştli kredit forumundan məlumat
Sahibkarlığa Kömək Milli Fondu güzəştli kreditlərlə bağlı növbəti işgüzar forum keçirib. İqtisadiyyat Nazirliyinin rəsmi məlumatına görə, aprelin 13-də Neftçala Sənaye Zonasında keçirilən foruma 80-ə yaxın sahibkar qatılıb.
Forumda çıxış edən Sahibkarlığa Kömək Milli Fondunun icraçı direktoru Şirzad Abdullayev qeyd edib ki, indiyədək Neftçala rayonundan olan 240-dək sahibkara 11 milyon manatadək güzəştli kredit verilib. O, son illər 160-a yaxın müasir sənaye müəssisəsinin maliyyələşdirilməsinə 510 milyon manat güzəştli kredit ayrıldığını qeyd edib.
İşgüzar forumda Aran iqtisadi rayonunda fəaliyyət göstərən sahibkarlar 5,3 milyon manat güzəştli kredit alıb. Kreditlər əsasən pambıq əkini və emalı müəssisəsinin yaradılması, heyvandarlıq, tərəvəzçilik sahələrinin inkişafına yönəldiləcək və bu investisiya layihələrinin reallaşdırılması 200-ə yaxın yeni iş yerinin açılmasına imkan yaradacaq.
