Faiq Əmirli müalicə olunur
AXCP sədrinin köməkçisi, “Azadlıq” qəzetinin maliyyə direktoru Faiq Əmirli 1 saylı Bakı İstintaq Təcridxanasında həkim müayinəsindən keçib.
Bununla bağlı Azadliq.info-nun vəkil Fəxrəddin Mehdiyevə istinadla yaydığı xəbərdə bildirilir ki, Faiq Əmirlinin öd kisəsində və qara ciyərində problem var.
Vəkilin sözlərinə görə, Faiq Əmirli təcridxananın tibb müəssisəsində müayinə olunub, xəstəliyi təsdiqlənib. Hazırda onun müalicəsi davam etdirilir.
Vəkil Faiq Əmirlinin saxlanma şəraitindən narazılığı olmadığını söyləyib.
Faiq Əmirli ötən il avqustun 20-də Bakıda tutulub. İstintaq onu ABŞ-da yaşayan türkiyəli ilahiyyatçı Fətullah Gülənin rəhbərlik etdiyi “Hizmət hərəkatı”nın nümayəndəsi kimi təqdim edir, dini düşmənçiliyin salınması, dini məzhəbləri yaymaq adı altında vətəndaşların hüquqlarını pozan qrup təşkil etməkdə günahlandırır.
