Dünyanın ən təhlükəli vulkanları
Dünyanın ən təhlükəli 5 vulkanının adı açıqlanıb. Bunlar Vezuvi (İtaliya), Niranqonqo (Konqo), Popokatepet (Meksika), Krakatau (İndoneziya) və Pektusan (Şimali Koreyada) vulkanlarıdır.
Novator.az-ın məlumatına görə, Böyük Britaniyanın Koventri Universitetinin alimi Metyu Blekett “The Conversation” nəşrinə açıqlamasında deyib ki, qlobal iqlim dəyişikliyi və digər ekoloji fəsadlarla üz-üzə qalmış müasir dünyanın bu vulkanlara diqqət yönəltməsi vacibdir.
Britaniyalı tədqiqatçının fikrincə, bu vulkanların hər birinin hər an oyanması təhlükəsi var. Onların oyanışı isə böyük dağıntılara və çoxsaylı insan ölümünə səbəb ola bilər.
Metyu Blekett bildirib ki, 1600-cü ildən bəri sözügedən vulkanların püskürməsi nəticəsində 280 mindən çox adam həlak olub. 1883-cü ildə Krakatau vulkanı qəfil püskürəndə böyük daşqınlar və qasırğalar baş qaldırıb, bu fəlakətlər zamanı 36 min insan həyatını itirib.
Blekettin sözlərinə görə, 1980-ci ildən sözügedən 5 vulkan ocağında, eləcə də başqa vulkanların ocaqlarında qismən fəallıq müşahidə edilir. Ona görə də alim insanları, bütün bəşəriyyəti hər an dəhşətli kataklizmlərə hazır olmağa çağırıb.
