Qəfəsə salınmış heyvanlar təbiətə qaytarılıb
Ekologiya və Təbii Sərvətlər Nazirliyinin ətraf mühitin mühafizəsinə dövlət nəzarətini həyata keçirən qurumları ölkə ərazisində çöl quşlarının və heyvanların qanunsuz ovlanması və satılması hallarının qarşısının alınması istiqamətində növbəti reydlər keçirib.
Rəsmi hesabata görə, 2017-ci ilin yanvar-mart ayları ərzində keçirilən reydlər zamanı qanunsuz ovla məşğul olan 65 vətəndaş saxlanıb, onlardan 61 ov tüfəngi, 147 patron, qanunsuz ovlanmış 11 quş və 4 heyvan götürülüb.
İnzibati xəta törətmiş 56 nəfərə 58136 manat məbləğində inzibati qaydada cərimə və iddia tətbiq olunub, 9 qanun pozucusunun şəxsiyyətinin müəyyənləşdirilməsi üçün polis orqanlarına müraciət edilib.
Aprel ayının əvvəlində keçirilən reydlər zamanı Ağstafa rayonundakı “Yaşıl Göl” istirahət mərkəzində 1 qonur ayının, Xaçmaz rayonundakı “Çənlibel” istirahət mərkəzində 2 Dağıstan turunun və Füzuli rayonundakı “Qarabağ” istirahət mərkəzində 2 qonur ayının və 3 ceyranın qəfəslərdə saxlandığı aşkar edilib. İstirahət mərkəzlərinin sahiblərinin hər biri 500 manat cərimə edilib, “Yaşıl Göl” və “Çənlibel” istirahət mərkəzlərindəki heyvanlar götürülərək Altıağac Milli Parkının nəzdindəki Vəhşi Təbiətin Bərpası və Reabilitasiyası Mərkəzinə təhvil verilib. “Qarabağ” istirahət mərkəzindəki heyvanların götürülərək təhvil verilməsi üçün zəruri tədbirlər görülür.
