Avropa Məhkəməsi Elmar Hüseynov işinə görə Azərbaycanı cərimələdi
Avropa İnsan Hüquqları Məhkəməsi aprelin 13-də Azərbaycana qarşı 23 iş üzrə qərarları elan edib. Novator.az bildirir ki, vəkil Əsabəli Mustafayev belə məlumat yayıb.
Məlumata görə, mərhum jurnalist Elmar Hüseynovun həyat yoldaşı Ruşaniyə Hüseynovanın şikayəti üzrə də qərar çıxarılıb.
Qərarda jurnalist Elmar Hüseynovun qətli ilə əlaqədar Avropa İnsan Hüquqları Konvensiyası ilə verilmiş yaşamaq hüququnun pozuntusu tanınıb, istintaqın səmərəli aparılmadığı vurğulanıb və bunun nəticəsində dəyən mənəvi ziyana görə 20 min avro kompensasiya, hüquqi xərclərə görə 10 min avro ödənilməsi tələbi qoyulub.
1967-ci ildə Bakıda anadan olan Elmar Hüseynov jurnalistikaya 1990-cı illərin əvvəllərində gəlib. Bir neçə rusdilli media quruluşunda çalışıb, daha sonra “Monitor” jurnalını təsis edib.
Elmar Hüseynov 2005-ci il martın 2-də Bakıda odlu silahla qətlə yetirilib. İndiyədək qətlin üstü açılmayıb, cinayətin sifarişçiləri və icraçıları həbs edilməyib.
Mərhum jurnalistin xanımı Ruşaniyə Hüseynova 2006-cı ilin sonlarında oğlu Aslanla birgə Norveçə mühacirət edib.
Əsabəli Mustafayevin məlumatına görə, Avropa Məhkəməsinin qərar verdiyi digər 22 iş azad seçki hüququnun pozuntusu barədədir. Bütün ərizəçilərə mənəvi ziyana görə 10 min avro kompensasiya, 22 iş üzrə hüquqi yardıma görə isə ümumilikdə 21 min avro kompensasiya təyin edilib.
