Qeyri-neft məhsullarının ixracı 0,3 faiz artıb
Dövlət Statistika Komitəsi xarici ticarət əlaqələri haqqında hesabat açıqlayıb. Novator.az-ın məlumatına görə, hesabatda qeyd olunur ki, 2017-ci ilin yanvar-fevral aylarında Azərbaycanın hüquqi və fiziki şəxsləri dünyanın 137 ölkəsindəki tərəfdaşları ilə ticarət əməliyyatları həyata keçirib, 77 ölkəyə məhsul ixrac olunub, 132 ölkədən məhsul alınıb.
Yanvar-fevral aylarında xarici ticarət dövriyyəsi 3 milyard 287,7 milyon ABŞ dolları, o cümlədən ixracın dəyəri 2 milyard 315,7 milyon dollar, idxalın dəyəri 972 milyon dollar təşkil edib, nəticədə 1 milyard 343,7 milyon dollarlıq müsbət ticarət saldosu yaranıb.
2016-cı ilin yanvar-fevral ayları ilə müqayisədə xarici ticarət dövriyyəsi real ifadədə 12,9 faiz, o cümlədən ixrac 13,5 faiz, idxal isə 11,8 faiz azalıb.
Ticarət dövriyyəsinin 42,9 faizi Avropa İttifaqı ölkələrinin, 11,2 faizi MDB ölkələrinin, 45,9 faizi isə digər ölkələrin payına düşüb.
Yanvar-fevral aylarında 176,2 milyon dollar dəyərində qeyri-neft məhsulları ixrac edilib, bu da 2016-cı ilin yanvar-fevral aylarına nisbətən real ifadədə 0,3 faiz çoxdur.
