Emin Milli: “Bütün mümkün variantlardan istifadə etməyə çalışırıq”
“Meydan TV” internet televiziyasının direktoru Emin Milli Novator.az-a açıqlamasında Meydan.tv saytının üzləşdiyi problemdən danışıb.
Bir müddətdir ölkənin bəzi media orqanının saytına giriş qapanıb. “Azadlıq” radiosunun Azadliq.org saytına, çap versiyası ötən ilin sentyabrında dayanmış “Azadlıq” qəzetinin Azadliq.info saytına, gənclərə məxsus Abzas.net saytına, xaricdə fəaliyyət göstərən “Meydan TV” internet televiziyasının Meydan.tv saytına giriş yalnız “proksi server” adlanan xidmətləri həyata keçirən saytlar vasitəsilə mümkündür. “Proksi” (proxy) ingiliscədən tərcümədə “başqa addan istifadə etmək” mənasını verir. Belə xidmətləri həyata keçirən saytlar istifadəçiyə bloklanmış saytlara daxil olmaq imkanı yaradır.
Emin Milli üzləşdikləri maneələrdən sonra Meydan.tv-yə giriş sayının xeyli azaldığını bildirib: “Yalnız “Facebook”da yayımlanan xəbərlərimiz oxunur. Eyni zamanda “proksi server” xidmətləri vasitəsilə giriş edənlər saytımıza baxa bilirlər. Bu serverlərdən istifadə etməyi isə hər oxucu bacarmır və ya buna vaxt ayırmır.
Biz xəbərlərimizin oxucuya çatması üçün bütün mümkün variantlardan istifadə etməyə çalışırıq. Vaxtaşırı “Meydan TV”nin “Facebook” səhifəsində “proksi server”dən necə istifadə edilməsi qaydası göstərilir. Eyni zamanda materiallarımızın qəzet formatını yayımlayırıq. Düzdür, bu, ənənəvi qəzet deyil, mətbəədə çap olunmur, sadəcə materiallarımızı qəzet formatında PDF faylında yığırıq və onu internetlə yayırıq. Amma bizdə olan məlumata görə, bəzi bölgələrdə PDF faylında olan materiallarımız kağıza çıxarılaraq da oxunur.
Təbii ki, texnologiya əsrində yaşayırıq, hakimiyyət saytlara girişi məhdudlaşdırmaqla xəbər axınının qarşısını ala bilməyəcək. Ən yaxşısı saytlara yaradılan maneəni aradan götürməkdir ki, əlavə üsullardan istifadəyə ehtiyac qalmasın. Xəbər almaq hüququndan məhrum edilən oxucuların etirazı da bu məsələdə müəyyən rol oynayır”.
