ƏDV-nin qaytarılması qaydasında dəyişiklik oldu
Dövlət başçısı İlham Əliyev ticarət festivalları dövründə alınmış mallara görə ödənilən əlavə dəyər vergisinin qaytarılması qaydasında dəyişiklik edib. Novator.az-ın məlumatına görə, aprelin 11-də imzalanmış fərmanla qaydanın 1.6-cı bəndi yeni redaksiyada verilir.
Əvvəlki varianta əsasən, alıcıya ödənəcək ƏDV məbləğindən 20 faiz həcmində xidmət haqqı tutulur, xidmət haqqı vergi orqanlarının büdcədənkənar gəlirlərinə aid edilirdi. Yeni variantda xidmət haqqının 50 faizi vergi orqanlarının büdcədənkənar gəlirlərinə, 50 faizi isə Mədəniyyət və Turizm Nazirliyinin büdcədənkənar gəlirlərinə aid ediləcək.
Ticarət festivalları dövründə fiziki şəxslərin Azərbaycanda aldığı, istehsal, yaxud kommersiya məqsədləri üçün nəzərdə tutulmayan mallara görə ödənilmiş əlavə dəyər vergisinin qaytarılması qaydası bu il fevralın 20-də təsdiqlənib.
Qayda aksizli mallara; ərzaq mallarına; dərman preparatları və tibbi ləvazimatlara; ölkə daxilində satışı ƏDV-dən azad edilən mallara; çərçivəyə salınmamış, emal edilməmiş və ya çeşidlənməmiş qiymətli daşlara; külçə şəklində qiymətli metallara; nəqliyyat vasitələri və onların ehtiyat hissələrinə şamil edilmir. ƏDV-nin alıcıya qaytarılması nağd ödəniş və ya bank kartına (və ya hesabına) köçürmə yolu ilə həyata keçirilir (Ticarət festivallarında xərclənən pul necə qaytarılacaq?).
Aprelin 10-da Azərbaycan paytaxtında ilk ticarət festivalı – “Baku Shopping Festival” başlayıb.
