İstehsal və yükdaşıma qiymətləri necə dəyişib?
2017-ci ilin yanvar-mart aylarında 2016-cı ilin eyni dövrünə nisbətən kənd təsərrüfatı məhsullarının istehsalçı qiymətləri 10 faiz, o cümlədən bitkiçilik məhsullarının istehsalçı qiymətləri 8,6 faiz, heyvandarlıq məhsullarının istehsalçı qiymətləri 11,8 faiz artıb. Novator.az-ın məlumatına görə, Dövlət Statistika Komitəsinin hesabatında belə deyilir.
Rəsmi hesabata əsasən, 2017-ci ilin mart ayında fevral ayına nisbətən kənd təsərrüfatı məhsullarının istehsalı 1,3 faiz, o cümlədən heyvandarlıq məhsullarının istehsalı 3,2 faiz bahalaşıb, bitkiçilik məhsullarının istehsalı 0,6 faiz ucuzlaşıb.
Başqa bir hesabatda qeyd olunur ki, 2017-ci ilin yanvar-mart aylarında 2016-cı ilin eyni dövrünə nisbətən nəqliyyat sektorunda yükdaşıma qiymətləri milli valyutada 12,4 faiz artıb.
Cari ilin mart ayında fevral ayına nisbətən yükdaşıma 2,5 faiz, o cümlədən boru kəməri nəqliyyatı ilə neft və qazın nəql olunması müvafiq olaraq 4,5 və 2,7 faiz, ölkələrarası yükdaşıma dəmir yolu və hava nəqliyyatında 2,7 faiz, dəniz nəqliyyatında 3 faiz ucuzlaşıb, avtomobil nəqliyyatında 8 faiz bahalaşıb.
