Alimlər qlobal istiləşmə ilə mübarizəyə səsləyirlər
Avstraliyanın elm adamları dünya ictimaiyyətini iqlim dəyişikliyi ilə bağlı təcili mübarizəyə səsləyiblər. Mütəxəssislər qlobal istiləşmə təhlükəsinin artdığını söyləyiblər.
Novator.az BBC telekanalına istinadla xəbər verir ki, alimlər misal olaraq yeni araşdırmalar zamanı üzə çıxan faktları göstəriblər. Onlar bildiriblər ki, artıq okeanlarda mərcan riflər sürətlə rəngini dəyişib parçalanır, canlı mərcan örtüyü anomal temperaturda bölünə-bölünə yoxa çıxır.
Rif – dayaz su sahələrində sualtı və suüstü yüksəkliklər deməkdir. Riflər sualtı və sahil qayalıqlarının dağılması və ya mərcan polip koloniyalarının, yosunların və digər rifyaradıcı orqanizmlərin çoxalması və artması nəticəsində yaranır. Avstraliya sahillərində 2600 kilometr boyunca mərcan rif divarı – “Böyük rif səddi” var.
Alimlər deyirlər ki, Avstraliya sahillərində də eyni problem yaşanır, riflər deqradasiyaya uğrayır. Bunun əsas səbəblərindən birini suda hərarətin artması ilə izah edən alimlər baş verənləri qlobal istiləşmənin mesajı kimi qiymətləndirirlər.
Mütəxəssislər insan amilini də vurğulayırlar. Bildirirlər ki, mərcan riflərin dağılmasının bir səbəbi də insanın təbiətdə oynadığı mənfi rolla, ekologiyanı, suları çirkləndirməsi, zəhərli, kimyəvi tullantıların sulara axıdılması ilə bağlıdır.
Alimlər dənizlərdə, okeanlarda gəmi üzdürən, sularda müxtəlif texnoloji vasitələrdən yararlanan şirkətlərin üzərinə böyük məsuliyyət düşdüyünü deyirlər.
Mərcan riflərin rəngini dəyişməsindən, ölü sima almasından danışarkən Avstraliyanın Ceyms Kuk adına Universitetinin professoru Terri Hyuz bildirib ki, iqlim dəyişikliyinə qarşı mübarizədə gecikən hər bir tədbir fəlakətə yol açır.
