Yerevan meri postuna kimlər iddia edir?
Ermənistan paytaxtı Yerevanda mer postu uğrunda mübarizəyə iki partiya, bir blok qatılıb. Novator.az-ın məlumatına görə, Mərkəzi Seçki Komissiyasına hakim Ermənistan Respublika Partiyasının, Əriklər Ölkəsi Partiyasının və “Çıxış” blokunun sənədləri təqdim olunub. Qeydiyyat aprelin 14-də bitəcək.
Mayın 14-də Yerevan Şəhər Şurasına seçki keçiriləcək. Qanuna görə, proporsional üsulla seçilən 65 nəfərlik Şəhər Şurasında mandatların yarıdan çoxunu əldə edən siyasi qüvvənin siyahısındakı ilk şəxs Yerevan meri olur. Heç bir qüvvə mandatların yarıdan çoxunu əldə etməsə, mer Şəhər Şurasının iclasında gizli səsvermə ilə seçilir.
Respublika Partiyasının siyahısına Yerevanın indiki meri Taron Marqaryan başçılıq edir. Əriklər Ölkəsi Partiyasının siyahısında deputat Zarui Postancyan, “Çıxış” blokunun siyahısında Vətəndaş Sazişi Partiyasının lideri, deputat Nikol Paşinyan birincidir.
Taron Marqaryan 2011-ci ildən Yerevan meridir.
