Tikinti maşınlarının 64 faizindən çoxu Bakıda cəmlənib
2017-ci il yanvarın 1-nə Azərbaycanın tikinti müəssisələrində 12099, o cümlədən dövlət müəssisələrində 5207, qeyri-dövlət müəssisələrində 6892 tikinti maşını olub. Novator.az-ın məlumatına görə, Dövlət Statistika Komitəsi belə hesabat yayıb.
Hesabatda qeyd olunur ki, tikinti maşınlarının 8,8 faizi Naxçıvan Muxtar Respublikasında, 64,4 faizi Bakı şəhərində, 7,8 faizi Aran, 7 faizi Abşeron, 4,3 faizi Gəncə-Qazax, 7,7 faizi isə digər iqtisadi rayonlarda cəmlənib.
2016-cı il ərzində 506 maşın istismara yararsız olduğuna görə silinib. 196 ədəd müxtəlif növ tikinti maşını alınıb, onların 97-ni yükünü özüboşaldan avtomobillər, 37-ni asfalt döşəyənlər, 21-ni yolbasan maşınlar, 41-ni isə digər növ tikinti maşınları təşkil edib.
