Gənc fəalların iştirakı ilə ekoloji mövzuda seminar keçirilib
Aprelin 7-8-də Bakıda vətəndaş cəmiyyətinin gənc fəalları üçün ekoloji mövzuda seminar keçirilib.
Niderland Krallığı Xarici İşlər Nazirliyinin maliyyələşdirdiyi və Avrasiya Əməkdaşlıq Fondunun həyata keçirdiyi “Azərbaycanda İnsan Haqları, Demokratikləşmə və Yaxşı İdarəetmənin Təşviqi” Proqramına əsaslanan bu tədbir “İnternyus-Servis Azərbaycan” MMC ilə Avrasiya Əməkdaşlıq Fondu arasında başlanmış “Ətraf mühit məsələlərinin gündəmə gətirilməsi: səfərbər edilmiş media və vətəndaş cəmiyyəti səyləri” adlı xidmət çərçivəsində baş tutub.
Seminarda gənc fəallar və ekoloji layihələr reallaşdıran QHT-lərin nümayəndələri ekologiya sahəsində biliklərin artırılması məqsədilə təlim keçiblər.
İki günlük təlimin proqramı ətraf mühitə müasir baxış, insanların sağlam ətraf mühitdə yaşamaq hüququnun qanunverici bazası, ekoloji sivilizasiya, insan hüquqları kontekstində beynəlxalq ekoloji standartların təhlili, canlı aləmin mühafizəsində vətəndaşların hüquqi məsuliyyəti kimi məsələləri əhatə edib.
Təlimi Milli Ekoloji Proqnozlaşdırma Mərkəzinin rəhbəri Telman Zeynalov, Milli Məclisin eksperti Şamil Hüseynov, Canlı Aləmin Mühafizəsi Alyansının sədri Mənsurə Rəsulzadə və hüquqşünas Araz Əsədli aparıblar.
Məqsəd ekoloji proseslərin həlli istiqamətində vətəndaş cəmiyyətinin fəaliyyətinə dəstək olmaq, bu sahədə ixtisaslı kadrların tövsiyələrindən yararlanmaq, bəzi neqativ tendensiyaların aradan qaldırılmasına təsir göstərməkdir.
Təlim zamanı gənc fəallar ekspertlərin iştirakı ilə təcrübi məşğələlər və interaktiv diskussiyalarda iştirak edərək onları maraqlandıran suallara da cavab alıblar.
Proqramın növbəti mərhələsində media nümayəndələri üçün ekoloji təlimin təşkili nəzərdə tutulub.
