Tramp əmr verdi, Suriya vuruldu
Aprelin 7-nə keçən gecə Aralıq dənizindəki ABŞ hərbi gəmiləri Suriyanı raket atəşinə tutub. Novator.az-ın məlumatına görə, Homs şəhərindən 45 kilometr aralıdakı Şayrat hərbi aerodromuna 60-a yaxın “Tomaqavk” qanadlı raketi atılıb. Aerodromdakı anqarların, hava hücumundan müdafiə sisteminin, neft bazasının dağıdıldığı xəbər verilir. Biri general olmaqla 4 Suriya hərbçisinin həlak olduğu barədə məlumat var.
Şayrat aerodromunun atəşə tutulma əmrini ABŞ prezidenti Donald Tramp verib. Bu, 2011-ci ildən vətəndaş müharibəsinin getdiyi Suriyada hakim rejimə ABŞ-ın ilk ciddi hərbi zərbəsidir.
Şayrat aerodromunun vurulmasını ABŞ hökuməti Suriya Hərbi Hava Qüvvələrinin İdlib vilayətinin Xan-Şeyxun şəhərinə kimyəvi silah hücumu ilə əlaqələndirib. Bir neçə gün əvvəl baş vermiş bu hücumda azı 100 dinc sakin həlak olub.
Suriyaya raket zərbələrinin endirilməsi dünyada müxtəlif reaksiyalar doğurub. Rusiya prezidentinin mətbuat katibi bəyan edib ki, Vladimir Putin raket hücumunun ABŞ-la Rusiya arasında münasibətlərə ciddi zərər vurduğu qənaətindədir. İran da hücumu pisləyib. Böyük Britaniya, İsrail, Türkiyə isə raket zərbələrini alqışlayıb.
Suriyada 2011-ci ilin mart ayında Əsəd sülaləsinin hakimiyyətdən getməsi tələbi ilə başlayan xalq hərəkatı sonradan vətəndaş müharibəsinə çevrilib. 2000-ci ildən ölkədə prezident postunu Bəşər Əsəd tutur. 1971-2000-ci illər arasında isə Suriyaya onun atası Hafiz Əsəd prezidentlik edib.
Rusiya və İran Bəşər Əsəd rejiminə, Qərb müxaliflərə dəstək verir.
