Şabran forumu: kreditlər və rəqəmlər
Quba-Xaçmaz iqtisadi rayonunda fəaliyyət göstərən sahibkarlıq subyektləri indiyədək 2333 investisiya layihəsinə görə 184,7 milyon manat güzəştli kredit alıb. Bu məlumat İqtisadiyyat Nazirliyinin Sahibkarlığa Kömək Milli Fondunun aprelin 6-sı Şabran rayonunun Gəndov kəndində keçirdiyi işgüzar forumda verilib.
100-dən çox sahibkarın qatıldığı forumda çıxış edən Sahibkarlığa Kömək Milli Fondunun icraçı direktoru Şirzad Abdullayev bildirib ki, indiyədək Şabran rayonundan olan 145 sahibkar 37 milyon manata yaxın güzəştli kredit götürüb: “Ümumilikdə indiyədək Quba-Xaçmaz iqtisadi rayonunda fəaliyyət göstərən sahibkarlıq subyektlərinin 2333 investisiya layihəsinin maliyyələşdirilməsinə 184,7 milyon manat güzəştli kredit ayrılıb”.
Şirzad Abdullayev deyib ki, dövlət başçısının tapşırığına uyğun olaraq ölkə ərazisində aqroparklar yaradılır: “Artıq Xaçmaz rayonunda “Yalama Aqropark”da 1-ci mərhələ üzrə işlər başa çatdırılıb, “Şəmkir Aqropark”da isə 1-ci mərhələ üzrə işlər davam etdirilir. Samux, Goranboy, Ağcabədi və Şabran rayonlarında da aqroparkların yaradılması istiqamətində işlər aparılır. Şabran rayonunda 1738 hektar ərazidə yaradılmasına başlanan aqropark layihəsinin ümumi dəyəri 14 milyon manatdır və bu layihənin reallaşdırılmasına 10 milyon manat güzəştli kredit ayrılıb”.
Novator.az Economy.gov.az-a istinadla bildirir ki, işgüzar forum çərçivəsində Quba-Xaçmaz iqtisadi rayonunda fəaliyyət göstərən sahibkarlara 10,4 milyon manat güzəştli kredit verilib. Kreditlər heyvandarlıq, tərəvəzçilik, bağçılıq, üzümçülük və s. sahələrin inkişafına yönəldiləcək, 100-ə yaxın yeni iş yerinin açılması mümkün olacaq.
