Azərbaycanda rus pulu qoyulan 700-dək müəssisə var
Azərbaycanda Rusiya sərmayəli 700-dək müəssisə fəaliyyət göstərir. Sankt-Peterburq Hökuməti ilə Azərbaycan arasında iqtisadi və humanitar əməkdaşlıq komissiyasının ilk iclasında belə deyilib. İclas aprelin 5-i Sankt-Peterburqda keçirilib.
Novator.az Economy.gov.az-a istinadla bildirir ki, Azərbaycan Respublikası və Rusiya Federasiyasının Sankt-Peterburq Hökuməti arasında iqtisadi və humanitar əməkdaşlıq komissiyasının həmsədri, iqtisadiyyat nazirinin müavini Sahib Məmmədov iki ölkə arasında əməkdaşlığın genişləndirilməsi üçün möhkəm hüquqi baza yaradıldığını vurğulayıb: “50-dən çoxu iqtisadi sahəyə aid olmaqla 170-dən artıq sənəd imzalanıb. İndiyə qədər Azərbaycandan Rusiya iqtisadiyyatına 1 milyard dollar, Rusiyadan Azərbaycan iqtisadiyyatına 3 milyard dollar sərmayə yatırılıb. Azərbaycanda Rusiya sərmayəli 700-dək müəssisə fəaliyyət göstərir.
2016-cı ildə Azərbaycanla Rusiya arasında ticarət dövriyyəsi 10,5 faiz artmaqla 2 milyard dollar olub. Rusiya ölkəmizin əsas ticarət tərəfdaşlarından biridir və Azərbaycanın xaricdə ilk ticarət nümayəndəsi də məhz Rusiya Federasiyasına təyin edilib”.
İclasda komissiyanın ilk iclasının protokolu imzalanıb. Sənəddə tərəflərin təsərrüfat subyektləri arasında birbaşa əlaqələrin genişləndirilməsi, Azərbaycan sahibkarlarının Sankt-Peterburq ərazisində keçirilən yarmarkalarda iştirakı, qarşılıqlı maraq kəsb edən sahələrdə birgə müəssisələrin yaradılması və s. sahələrdə əməkdaşlıq və birgə tədbirlər nəzərdə tutulur.
