Zərdab: 10 min hektar ərazinin suvarma təminatı ilə bağlı layihə yekunlaşır
Zərdab rayonunda 10 min hektar ərazinin suvarma təminatının yaxşılaşdırılması layihəsinin icrası yekunlaşmaq üzrədir. Məlumat Novator.az-a “Azərsu” Açıq Səhmdar Cəmiyyətinin mətbuat xidmətindən verilib.
Məlumatda deyilir ki, icrasına fevral ayında başlanmış layihəyə uyğun olaraq əkin sahələrinə su Kür çayından veriləcək. Bu məqsədlə çayın sahilində məhsuldarlığı saniyədə 3 kubmetr olan sugötürücü qurğunun, nasos stansiyasının, təzyiqqırıcı kameranın və magistral kəmərin inşası layihələndirilib
Əkin sahələrinə suyun nəqli diametri 1400 millimetr olan kəmər vasitəsilə həyata keçiriləcək. İşlərin qısa müddətdə başa çatdırılması məqsədilə boruların qaynaqlanması və torpağa basdırılması paralel olaraq 4 nöqtədə aparılıb və kəmərin tikintisi yekunlaşıb.
Sugötürücü qurğuda suyığıcı kameranın giriş və çıxış hissələrinin bünövrəsi betonlanıb, monolit beton divarların armaturlanması işləri tam yekunlaşıb, betonlama işlərinə hazırlıq görülür.
Nasos stansiyasının tikintisi çərçivəsində isə betonlama və izolyasiya işləri aparılıb, nasosların mexaniki hissələrinin quraşdırılmasına başlanıb. Nasos stansiyasını elektrik enerjisi ilə təmin etmək üçün transformator və paylayıcı qurğunun bünövrə hissəsinin tikintisi davam etdirilir. Qurğuları elektrik enerjisi ilə təmin etmək üçün Zərdab yarımstansiyasından 4 kilometr elektrik xətti çəkilib, 81 ədəd dayaq quraşdırılıb.
Zərdab rayonunda həyata keçirilən suvarma layihəsi üzrə tikinti-quraşdırma işlərinin aprel ayında başa çatdırılması nəzərdə tutulur.
“Azərsu” ASC Zərdab rayonu ilə yanaşı, Hacıqabul və Şamaxı rayonlarında, Padarçöl adlanan ərazidə 10 min hektar ərazidə suvarma layihəsinin icrasına başlayıb. Bu ərazinin suvarılması Hacıqabul rayonunun Talış kəndi yaxınlığındakı Kür sutəmizləyici qurğularının imkanlarından istifadə etməklə aparılacaq. Bu məqsədlə təmizləyici qurğudan Padarçöl ərazisinə 27 kilometr magistral kəmərin inşası layihələndirilib.
-
- DCIM100MEDIADJI_0417.JPG
